瘀爆見工實錄

Bad Interview

相信睇完 見工必勝法,你已經知道有咩用得著嘅貼士同技巧,但你又聽過幾多瘀爆見工故事? 的而且確,見工係可以好恐怖,但就算失敗都唔好灰心,因為塵世間仲有好多人陪你。以下幾個瘀爆嘅見工故事,你睇完可能陪當事人尷尬埋一份!不過,與其知道有人見工「瀨野」之餘表現仲差過自己,不如一齊化悲憤為力量,從錯誤中學習,避免日後親手斷送好工! 註:以下故事稍作修改,以免暴露當事人身份。

1. 大汗長命斜

是咁的,話說屋企人幫我搭路,安排星期三11點見一份工。當時係七月,天氣仍然好熱,間公司仲要同地鐵站有啲距離,我睇Google Map都要喺條街行7分鐘先到,咁我諗住早15分鐘去到地鐵站再行過去就實掂啦。

點知當日我第一個錯誤,就係10點50分先到地鐵站再開始行過去。一來熱都算,二來間公司原來喺一條奪命斜上面!我一路行上去一路係咁流汗,望一望錶已經10點56分,但行得一半都無,咁無計,唯有出絕招……就係跑!

當時我出盡力咁跑上公司,一到大廈門口先發現自己唔記得幾多樓!唯有喺Lift口(仲要有一部壞,得兩部Lift用)搵部電話出黎係咁搵封Email,呢個時候我已經熱到濕曬。搵完Email再等一萬年,終於等到Lift,一入去就猛撳32樓,亦即係尾三嗰層。好喇,到我入去見到負責面試嘅人事部經理,佢一見到我咁狼狽就已經黑面。 結果我幾點到?11點21分。咁我見唔見得成份工?梗係失敗啦…… 後來我先知道經理不滿我遲到同無事先預好時間。我都覺得自己抵死,無話可說。

要去唔熟悉嘅地方(特別係天氣又濕又熱嘅時候),預好行程同時間非常重要,最理想係見工時間前早到30分鐘準備。就算好熱都可以喺附近Cafe坐低抖下先去見工,咁一入去就唔會匆忙又狼狽。仲有,千祈唔好最後一分鐘先到公司!

2. 兩手空空去見工

我公司做網上軟件銷售,官網有曬資料。話說當時要請銷售員,有個人黎見工,一入黎就自信爆棚到有啲寸。我同佢入會議室之後就問佢以前嘅經驗、對呢個職位嘅諗法。佢都介紹返之前嘅經驗,一路聽都覺得不錯,但到我問佢對呢份工有咩期望時,突然有180轉變。佢一臉空白望住我問:「可唔可以講下份工嘅職責?」佢咁問又唔代表啲咩,我當然解釋返職責係咩。然後佢話「哦……咁其實我即係要Sell啲咩?」 唔使問,結果我多謝佢抽時間黎見工,然後送佢走。要求僱主解釋工作職責並無問題,不過見工前無做功課、無睇清楚公司產品,咁我大概知道佢做野會有咩表現了。 見工時唔好浪費自己同面試官嘅時間,與其兩手空空咁去見工,不如花少少時間做返兩手準備,留低良好印象。瀏覽公司官網、善用Google新聞搜尋都係好開始,機會係留俾有準備嘅人,無準備就只會浪費時間。

3. 語言藝術大師

當時公司要請SQL(Structured Query Language)技術員,有個女仔黎見工,睇佢履歷都好好,做過相關工作之餘經驗都充足。不過正式面試時,我地問佢工作經驗,佢好似諗好耐先講到工作情況、同咩人共事。好啦,我都明白緊張時的確會諗唔起頭一兩份工嘅經驗。之後我地問佢一啲技術問題:「你會點樣用SQL完成呢項工作?」佢第一時間答「我會Export去Excel,再用Excel去改。」 嗯……唔係心目中嘅答案,我決定再問一題考考佢。點知佢答「我諗我都係Export去Excel先去處理數據。」 於是我扮曬睇其他面試問題,然後偷偷地Google佢頭一部分嘅履歷,點知第一個結果就係「SQL管理員履歷範本」,換句話講,呢位小姐直接下載呢份網上履歷見工!佢點解覺得咁做可以搵到工?我真係好費解。之後俾佢睇我已經拆穿佢,佢都係返歸喇。

大家寫履歷有時係會誇大少少,但太誇張只會自食其果。記住,履歷上列舉嘅能力同經驗要符合大部分事實,見工時你先能夠提出相應例子。寫份履歷寫到天花龍鳳,出事時就真係搞出大頭佛喇。

Chris Chu

Freelance writer, passionate about professional and personal development.

4 分鐘閱讀

相關搜尋

為你推薦...

不少人求職的時候都會海量send CV,好多時已經不記得申請了哪一間公司。誰不知突然一個電話,要求做個初步的電話面試,霎時間無準備、對公司又無頭緒,點算?

Glassdoor的調查顯示,面試最難的公司有不少刁鑽問題都是考你腦筋急轉彎,一些更非常無厘頭。到底如何準備一些突如其來的面試問題?

Google、Apple、Bloomberg等跨國公司的「惡搞」面試題目,不時考起一眾求職者,可以如何回答?

小組面試(group interview)有別於一般的一對一標準面試,組員需要在面試中經歷更多的不同考驗,看看你如何應對其他候選人的挑戰,並脫穎而出。

3搵工
中型 · 科技 · 西營盤,香港
9搵工
中型 · 電子商務 · 荃灣西,香港
8搵工
小型 · 技術 · 蘭桂坊,香港
11搵工
大型 · 法律 · 中環,香港