工作時犯大錯,點收科?

Mistake

相信大家都試過,發現做錯事當刻一定心情沉重兼難以置信,個心係咁跳之餘仲不斷問自己「點解會咁?點會我會做錯呢件事?而家點收科?」

無論係Send錯Email俾客,報價時報得太低,定睇錯合約條款搞到公司蝕大錢,以上種種都其實都可以歸類為「人為過失」,時不時都會發生。雖然一旦做錯就無得返轉頭,但即時採取行動一定會減輕後果。

有人第一時間想收收埋埋博大霧、卸責、逃避責任或者扮唔知,但都只係權宜之計,長遠來講無法解決問題。冷靜啲,不如睇下有咩拆解方法。

1. 避免不動聲色極速解決

犯錯嘅嚴重性可大可小,就算想趁無人知快速解決,呢個方法都未必可以套用到所有問題。何況面對突發情況已經急到一頭煙,要理智作出決定可謂難上加難。更明智嘅做法係嘗試抽時間,策劃適切有效嘅回應。我地明白無人想醜事傳千里,但建議最少向上司彙報,儘可能開誠佈公解釋來龍去脈。係呀,佢地可能會好激氣,不過佢地帶黎嘅見解分分鐘抵消你所受嘅氣。有需要嘅話就搬「人總會犯錯」出黎擋駕,大多數經理都係過來人,總會明白的。

2. 承擔責任,承認過失

用各種方法逃避責任根本避唔到一世,既然已經犯錯,就算只佔小部分責任都要企出黎承擔過失同道歉。假如造成嘅破壞麻煩到好多人,就要向每位受影響人士道歉,可以嘅話最好親自道歉添,充分發揮誠意,令對方覺得貼地,甚至切身處地作出回應,不至於令你太尷尬。呢個時候最忌胡思亂想,要冷靜落黎睇清狀況,明白到發生錯誤實屬無心之失,而家重點係儘快撥亂反正。

3. 為多方考慮

當然唔係指胡思亂想、杞人憂天到胃痛,而係考慮到各個方面,以求照顧到唔同情況。呢一刻係解決問題嘅時候,最理想係預計最好同最壞嘅結果。你要思考各種可以達到最佳結果嘅方式,同時要諗好每個做法,避免導向最壞結果。前文都講過身處突發情況時思路未必清晰,試下搵埋經理或者相關同事傾下,可能有幫助之餘仲俾到其他睇法你。

4. 即時行動

策劃出解決方法就要全速執行,係咪需要重新審視成個Project、同客戶開會認衰仔、定要即刻打俾律師?無論份工保唔保得住都唔好拖延時間。可能你呢一刻努力制止自己崩潰,好懷疑、好憎自己,但都要收拾殘局,保持專業;最多解決之後再返屋企咬枕頭啦。

5. 振作精神

想理清思緒的話,可以暫時避開風頭。犯錯後覺得尷尬並無問題,不過事發一日之後就好回復正常喇。錯左就錯左,第二日可能有人錯得仲嚴重過你,令大家唔記得曬,所以要保持一份自尊。一次錯誤不足以抵消一直以來嘅付出,更加唔可以抹殺你犯錯當日前嘅種種功勞。最後不妨喺適當時機同同事傾返呢件事,笑一笑又係一條好漢。

6. 吸取教訓

唔使多講,當事件已經結束(而份工又保得住)就要反思當初點會發生,着力改善,以免重複犯錯。同時要俾因你而受影響嘅人知道,你已經吸取教訓,唔會再出現同樣錯誤。你會發現大多數人都肯原諒,畢竟教訓都係學習嘅一部分;但亦唔好因此鬆懈,要表現出自動自覺、銳意改善嘅態度。

Naomi Chan

Career Coach and professional career hacker at Team Vanna

3 分鐘閱讀

相關搜尋

為你推薦...

開始新工作,來到新環境,除了留意自己與公司文化、同事能否融入之外,更要看看自己的工作表現,因為試用期才剛剛開始,而你的一舉一動都被看在眼內,要平安渡過危機的話,有些事情還是要做得妥當。

人皆有錯,但如果在工作中出錯卻可以有很嚴重的後果,甚至會讓你丟了工作。每個人都有機會在工作上犯錯,但有些錯誤明明可以避免,最後卻變成「世界級」大錯。

不少老一輩直言千禧世代「唔挨得」。然而不少研究均顯示,「Hea住返工」的工作態度才帶來更高工作效率。

回覆email是藝術,更是每一個打工仔必須具備的技術。但Email經常造成誤解,如果你收到一炸彈級email,如何拆彈?

9搵工
中型 · 電子商務 · 荃灣西,香港
17搵工
大型 · 食物&飲品 · 上環,香港
11搵工
大型 · 法律 · 中環,香港
3搵工
中型 · 科技 · 西營盤,香港